✦ Şörəyel mahalının Artik rayonunun Qıpçaq (31.05.1946-cı ildən – Ariç) kəndində qədim türk qalası. Qıpçaq qalası kimi, Qıpçaq kəndi və məbədi də eyniadlı düzənlikdə, məşhur Qıpçaq düzündə yerləşir. Qala ərazisindəki qədim məbədin 1201-ci ildə tikildiyini nəzərə alsaq, çox asanlıqla ehtimal etmək olar ki, qala ən azı XII yüzildə, bəlkə daha əvvəllər inşa edilmişdir. Təəssüf ki, kəndin və məbədin ətrafında qalanın ancaq qalıqları qalmaqdadır. Adından da göründüyü kimi, qala Qərbi Azərbaycan ərazisində ilkin orta çağlardan məskunlaşmış Qıpçaq türklərinə məxsus olmuşdur. Bu ərazilərə ilk ermənilər XIX yüzilin ortalarında İrandan və Türkiyədən köçürülüb gətirilmişlər.