✦ İrəvan şəhərində mövcud olmuş məşhur evlərdən biri. Sovet hakimiyyəti dövründə dağıdılmış bu ev hazırkı Nalbəndyan küçəsində yerləşirdi. Ev və ya imarət Makinskilər ailəsinə mənsub Pənah xan Makinski tərəfindən tikdirilmişdir. 

✦ Ev və ya imarət İrəvandakı Xan sarayı üslubunda tikilmişdir. İmarət İrəvan şəhər Dumasının deputatı, kollej müşaviri Süleyman xanın oğlu Pənah xana məxsus yaşayış kompleksi idi və onun adını daşıyan meydanda — Nalbandyan küçəsi 19 (keçmiş Ter-Qukasov küçəsi) ünvanında yerləşirdi. Kompleksə xanın ikimərtəbəli evi, mətbəx, anbar, ayrıca həyətlərdə nökərlər üçün birmərtəbəli evlər və tövlələr daxil idi. İmarət İrəvanda dövlət tərəfindən qorunan memarlıq abidələri siyahısına salınmış, lakin 1960–1970-ci illərdə imarətin ətrafında uyğunsuz obyektlər tikildikdən sonra tanınmaz hala düşmüş və baxımsızlıq nəticəsində yox olma həddinə çatmışdır. Pənah xan Makinskinin evinin yerləşdiyi ərazi isə son vaxtlara qədər Pənah xan meydanı və yaxud Pənah xan bulvarı adlanırdı.